WANASIASA KILIMANJARO WAMLILIA PETER KISUMO.
Posted in
Habari na Jicho Pevu la Kijiwe
No comments
Friday, August 7, 2015
By
danielmjema.blogspot.com
Na Mwandishi Wetu, Kilimanjaro.
KUFUATIA kifo cha Kada wa siku
nyingi wa chama cha mapinduzi (CCM) na mmoja wa waasisi wa TANU na baadae CCM, Mzee
Peter Kisumo, aliyefariki dunia juzi majira ya saa moja usiku katika Hospitali
ya Taifa ya Muhimbili, makada mbalimbali wa chama cha mapinduzi mkoani
Kilimanjaro pamoja na viongozi waliowahi kufanya naye kazi wametaja msiba huo
kuwa ni pigo kwa Taifa hili.
Taarifa
zilizothibitishwa na Mtoto wake, Michael Kisumo, zinasema kuwa, hali ya ugonjwa
wa Marehemu Peter Kisumo ilifikia katika kiwango cha juu na kulazimika
kufanyiwa uchujaji wa figo mara tatu kwa wiki kila Jumatatu, Jumatano na
Ijumaa.
Mwanasiasa huyo mkongwe nchini
ambaye aliwahi kushika nyadhifa kadhaa katika Serikali ya Awamu ya Kwanza,
alifariki Dunia Agosti 3, mwaka huu, akiwa katika Hospitali ya Muhimbili ambako
alikopelekwa kwa ajili ya kufanyiwa dialysis (usafishaji damu katika figo)
kabla ya kujitokeza kwa utata (complication) kulikopelekea kuharisha damu.
Wakizungumza na mtandao wa
Kijiwe chetu Blog, viongozi hao walisema msiba huo umekuja kipindi ambacho
Taifa bado linahitaji msaada wake hasa kipindi hiki muhimu ambacho nchi
inajiandaa katika Uchaguzi unaotarajiwa kufanyika Oktoba 25, mwaka huu.
Nsilo
Swai.
Mwenyekiti mstaafu wa Chama cha
Mapinduzi mkoani Kilimanjaro, Mama Vicky Nsilo Swai, alisema msiba huo ni pigo
kubwa kwa Taifa hili kwani alikuwa na mchango mkubwa katika siasa za vyama
vingi.
Nsilo Swai alimtaja Marehemu
Mzee Kisumo, kama mtu aliyependa sana kusaidia, mcheshi na kwamba Mzee Kimaro
alikuwa msaada mkubwa kwake katika miaka yake 17 ya Siasa.
Alisema Chama cha Mapinduzi
mkoani Kilimanjaro daima kitaendelea kuenzi yale yote mema ya Mzee Kisumo.
“Msiba huu ni pigo kubwa kwetu,
ni pigo kubwa kwa Taifa la Tanzania, ni pigo kwa chama cha Mapinduzi, Mzee
Kisumo alikuwa ni kiongozi wa mfano, alikuwa mcheshi, mpenda chama, mpambanaji,
katika miaka yangu 17 ya Siasa, alinisaidia sana na hata katika miaka yangu 10
ya Uenyekiti alikuwa ni mtu muhimu sana kwangu” alisema Nsilo Swai.
Dkt. Augustino Mrema.
Kwa
upande wake Mwenyekiti wa chama cha TLP Taifa, Dkt. Augustino Mrema alisema
Daima wananchi wa Vunjo watamkumbuka sana Marehemu Peter kutokana na ukarimu
wake kwao kwani miradi mingi ya maendeleo katika jimbo hilo ilianzishwa na
Kisumo.
Akitolea
mfano miradi ya maji katika eneo la Njia panda ambayo kwa sasa yako chini ya
mamlaka ya maji safi na maji taka ya wilaya ya Moshi (MUWSA), Dkt. Mrema
alisema miradi hiyo pamoja na mingine mengi jimboni humo yalifadhiliwa na
Kiongozi huyo.
“Kisumo
alikuwa mtu wa watu, wana Vunjo wanamkumbuka sana, amesaidia kuhakikisha
tunapata maji, pale njia panda na jimbo zima alisambaza maji, Kisumo ni
mzalendo wa kweli, mpiganaji na kiongozi makini sana”, alisema Dkt. Mrema.
Mbunge
huyo wa Jimbo la Vunjo, anayemaliza muda wake, alimtaja Marehemu Peter Kisumo,
kama kiongozi mvumilivu, mzalendo na mtu ambaye daima alitanguliza mbele
maslahi ya wananchi wake bila kujali itikadi zao za kisiasa, dini wala kabila.
Michael Mwita.
Katibu
wa Uenezi na Itikadi wa Chama cha Mapinduzi (CCM), mkoani Kilimanjaro, Michael
Mwita aliwataka wananchi wa Mkoa huo kuungana pamoja kuenzi yote mema
aliyoyahubiri kiongozi huyo kuhakikisha mkoa huo unaendelea kupiga hatua katika
maendeleo.
Mwita
alisema alimfahamu Marehemu Peter Kisumo, kama Kiongozi mahiri aliyekuwa na
Msimamo usioyumba na kwamba siku zote hata baada ya kung’atuka katika ulingo wa
siasa aliendelea kutumia busara zake kuhakikisha chama hakiyumbi.
“Chama
kimempoteza mtu muhimu sana, mtu mzoefu na kiongozi makini sana, Mzee Kisumo
nilimfahamu tangu nikiwa mdogo, tunamzungumzia mtu aliyeshika nyadhifa
mbalimbali za uongozi katika taifa, alitumia busara zake kutatua vurugu ndani
na nje ya chama, sina mengi ya kusema zaidi ya kuwataka wanaCCM kuenzi yote
katika kipindi hiki ili itusaidie kuchukua dola”, alisema Mwita.
Kisumo
aliwahi kuwa mmoja wa mameneja wa kampeni wa Rais Jakaya Kikwete mwaka 2005
akisimamia kanda ya kaskazini iliyojumuisha mikoa ya Kilimanjaro, Arusha na
Tanga. Mbali ya kuwa waziri, Kisumo aliwahi pia kuwa Mbunge wa Jimbo la Mwanga,
mkuu wa mkoa wa Mwanza (1975-1977) na mdhamini wa CCM.
Habari Zingine
Mjulishe Mwenzako
.jpeg)
0 MAOINI :